LAOAG CITY – Kalikagum ni Presidente Ferdinand Marcos Jr. nga ibati iti panagleppas ti terminona inton 2028 ti maysa a kultura nga agtultuloy a panagdur-as ken nation-building pakairamanan ti nangatngato a talek ti publiko iti gobierno.
Inbatad ti Presidente a gagemna a makita ti maysa a gobierno a kabinnulig dagiti umili ken nagduduma a sektor iti panagpaimbag ti pagilian.
Kiddawna nga ad-adu pay a trabaho ken pagsapulan, agtultuloy a panagdur-as ken ad-adda nga aktibo a makipaset ti pagilian iti ekonomia ti sangalubongan.
Inpettengna a napateg ti papel dagiti lokal a gobierno iti panangipaay ti serbisio gapu ta ad-adda nga ammoda ti kasasaad ken kasapulan ti komunidad-da.
Segun ken ni Presidente Marcos, ad-adda a maiyasideg kadagiti umili ti gobierno no mapapigsa pay dagiti local government unit (LGU).
Kunana a saanna a namnamaen nga agbalin kas perperko ti panangidaulona ngem namnamaenna nga agleppas ti terminona nga adda ti napateg nga ambagna iti panagdur-as ken panangpatibker ti pagilian.
