LAOAG CITY – Naminsan manen a nagpasagid ni Presidente Ferdinand Marcos Jr. ken ni dati a Presidente Rodrigo Duterte seknan iti kill joke daytoy kadagiti Senador.
Iti campaign rally idiay Pasay City, sinaggaysa ni Presidente Marcos nga inyam-ammo dagiti pambatona a Senador.
Segun iti Presidente, sigsiguradoenna laeng nga awan kadagiti pambatona a Senador ti napabettakan ti granada kageddan ti rakurak ni Duterte a patayenna ti 15 a Senador tapno makastrek iti Senado ti siam a kandidatona iti babaen ti PDP-Laban.
Inpettengna iti grupoda ket awan ti mangngeg a dakes a sarita ken pammutbuteng.
Kuna pay ni Presidente Marcos, napigsa ti pakinakemna nga iendorso ti 12 a kandidato gapu ta ti kinakappia ken panagdur-as ti pagilian ti gagem dagitoy.
