LAOAG CITY – Nagturong iti Department of Justice (DOJ) dagiti pannakabagi ti Presidential Communications Office (PCO) tapno mangipasa ti rekomendasion tapno kasoan ti sumagmamano a personalidad a maipagarup nga agiwarwaras ti fake news.
Segun iti mangidadaulo ti Presidential Communications Office Anti-Fake News Desk a ni Director Robertzon Ramirez, partikular a paimbestigaranda dagiti adda iti likudan ti Facebook accounts nga “Iloy Bugris: The Queen of Revelations” a nag-live ken nangibaga a nakaro ti sakit ni Presidente Ferdinand Marcos Jr. ken nangiparuk-at ti fabricated document no sadinno a dimmawat pay ti kuarta manipud kadagiti viewers.
Paimbestigaran pay ti account a “Rigondola Ping” a nagiwaras ti manipulated a ladawan nga adda iti nakaro a kasasaad ni Presidente Marcos ken ti account nga addaan ti nagan a “Crage Anderpal” a nangibaga nga adda ti opisial a kumpirmasion ti seryoso a kondision ti Presidente.
Immunan nga inyendorso ti Presidential Communications Office iti Department of Justice nga imbestigaran ti Facebook page a Malasakit News Pilipinas gapu iti panagwaras ti maipagarup nga emergency lockdown.
Basar iti Presidential Communications Office, ti nairanta a panagiwaras kadagiti saan nga umno nga impormasion aglalo ita nga adda ti naideklarar nga State of National Energy Emergency ket maibilang a krimen nga adda ti maiyannatop a pannusa.
Kuna met ni Department of Justice Spokesperson Atty. Polo Martinez, iyendorsoda iti National Bureau of Investigation (NBI) dagitoy tapno imbestigaran ti pangipila ti maiyannatop a reklamo.
