LAOAG CITY – Kinomendaran ni Mr. Marcell Tabije, ti mangidadaulo ti Provincial Disaster Risk Reduction and Management Office dagiti local government unit ditoy probinsia a mangiwaywayat ti simulation exercise pakaseknan iti earthquake preparedness.
Kunana a karaman kadagitoy nga aktibidad ket ti panagsagana kadagiti posible a mapasamak no addan ti gingined kas iti fire incident ken traffic accident.
Kuna ni Tabije a daytoy ti maysa a wagas ti Disaster Risk Reduction and Management Council tapno maipakaammo iti publiko no ania dagiti rumbeng nga aramiden no adda ti didigra ken tapno saan da a maiyaw-awan no dumteng ti kastoy a pasamak.
Mainaig iti daytoy, agtultuloy pay ti information dissemination campaign ti Provincial Disaster Risk Reduction and Management Office gapu ta patien ni Tabije a babaen kadagitoy ket maamoan dagiti residente ken makasagana da iti aniaman nga insidente.
Maipalagip nga immunan nga inrakurak ni Tabije a manarimaan ti panag-assess ken panagmonitor dagiti municipal disaster risk reduction and management office kadagiti istraktura tapno maduktalan no adda dagiti kasapulan a dumalan ti retrofitting.
Kunana a ti ipangpangruna da ket dagiti daan nga imprastraktura kas iti ospital, pagadalan, rangtay ken dagiti establishimento wenno kadagiti mall a tapno makita ti integridad dagitoy.
Kabayatanna, nagpalagip ti Provincial Disaster Risk Reduction and Management Office a makikooperar dagiti umili no adda ti naisayangkat nga earthquake drill ken kasapulan a seryosoen dagitoy a banag nangruna ket para iti pagsayataan met laeng ti tunggal indibidual.
