LAOAG CITY – Mannarimaan ti panangilakad ti Provincial Assessors Office kadagiti kasapulan a dokumento para iti pannakaipatungpal ti Phase 2 ti Adigi Homes a masarakan ditoy ciudad ti Laoag.
Inlawlawag ni Ms. Evalaudia Duyor, Officer In-charge ti nadakamat a pangopisinaan a naipasan ti opisinada dagiti dokumento a kasapulan iti National Housing Authority wenno NHA.
Segun kenkuana, ti National Housing Authority ti paggapoan ti pondo para iti nasao a proyekto pakairamanan ti pannakaipatakder dagiti balay.
Nupay kasta, inpalgakna a basar iti immuna a saritaan ti National Housing Authority ti mangipatakder iti balay ngem apaman a malpas ket i-loan met laeng daytoy dagiti mangala ti balay iti PAG-IBIG.
Inbatadna nga adda ti posibilidad a mabaliwan ti orihinal a saritaan a maipada iti maipatpatungpal nga istratehia iti Sta. Monica ti National Housing Authority nga isuda ti agpatakder ken agsingir.
Kinunana, ti nagdumaan na ti nadakamat a banag ket iti lote a nakaipatakderan dagiti balay ket kukua ti gobierno probinsial ti Ilocos Norte.
Inbunannagna nga adda ti maysa a gakat a nakaipalaonan ti pannakaipaay ti bileg ken ni Gob. Matthew Marcos Manotoc nga agpirma iti nagan ti gobierno probinsial a mangipaay ti otorisasyon iti National Housing Authority a mangusar iti lote.
Inlawlawagna a maysa pay laeng a draft ti nasao a resolusion ken masapul a maadal a naimbag babaen iti National Housing Authority, Sangguniang Panlalawigan ken ti Gobernador.
Nupay kasta, mangnamnama ni Duyor a maaprobaran ti nasao a gakat iti kabiitan a panawen.
Kabayatanna, inpakaammona a sakbay a maipatakder dagiti balay ket nasken a maisayangkat nga umuna ti “market survey” a pangidasaranda ti detalye kadagiti maipatakder a balay kas iti disenio ken plano na tapno makaallukuyda kadagiti gumatang.
