LAOAG CITY – Inlawlawag ni Mr. Orlando Pangilinan, General Manager ti Philhealth ditoy ciudad ti Laoag a mausar latta dagiti OFWs ti philhealth da uray adda da diay abroad.
Daytoy ket babaen ti panangreimburse iti Philhealth da ti aniaman a magastos da idiay ballasiw taaw no agsakit ken agpaagas da iti ospital.
Inbatad na nga addan dagiti sumagmamano nga OFWs manipod iti nagduduma a pagilyan a naospital wenno nagpaagas ken nai-reimburse da ti nagastos da iti Philhealth.
Inpakammo ni Pangilinan a saan laeng a dagiti OFWs ti naipangato ti kontribusyon na no di ket uray dagiti mangmangged ditoy pagilyan a nangrugi pay laeng idi Enero ita a tawen kas paset ti Universal Health Care Law.
Innayon na a mapasamak laeng ti kayat dagiti OFWs a saandan a mairaman a maipangato ti kontribusyon na no maamendaran ti nasao a paglintegan.
Immapela pay ni Pangilinan a saan koma a kagurgura ti Philhealth gapu ta ipatpatungpal da laeng ti paglintegan.
