LAOAG CITY – Manamnama ti pannakaideklara ti food security emergency para iti bagas babaen ti Department of Agriculture (DA) inton Pebrero 4, basar ken ni Department of Agriculture Secretary Francisco Tiu Laurel Jr.
Inaprobaran ti National Price Coordinating Council (NPCC) daytoy nga addang tapno maipababa ti presio ti bagas iti merkado.
Iti babaen ti deklarasion, mangiruar ti National Food Authority (NFA) ti 300,000 metric tons ti bagas iti uneg ti innem a bulan tapno mapatibker ti presio ken kissayan ti stock kadagiti warehouse.
Inbatad ni Tiu Laurel, mabenepisiaran pay ditoy dagiti lokal a mannalon gapu ta ti National Food Authority ket makagatang ti baro nga apit manipud kadakuada.
Kuna met ni Trade and Industry Secretary Ma. Cristina Roque, daytoy nga addang ket saan laeng a makatulong kadagiti gumatang no di ket mangpapigsa pay kadagiti sektor ti agrikultura.
Kabayatanna, manarimaan ti pannakikoordinar ti Department of Agriculture iti National Food Authority, Food Terminal Inc., ken Kadiwa para iti pannakaipatungpalna a mangrugi inton Pebrero 5.
