LAOAG CITY – Naduktalan a ti mapapati a top boss ti na-raid a Philippine Offshore Gaming Operators wenno POGO hub idiay Porac, Pampanga ket ni Duanren Wu, dati a Chinese police officer.
Pinasingkedan daytoy ni Cassandra Li Ong, ti Whirlwind Corporation ken pannakabagi ti Philippine Offshore Gaming Operators hub Lucky South 99 idi dinamag ni Committee on Dangerous Drugs chair Surigao del Norte 2nd District Representative Robert Ace Barbers kabayatan ti maikapat a joint public hearing ti Kamara.
Inpakaammu pay ti agpanpanday-linteg ken ni Cassy Ong a basar iti naurnongda nga impormasyon, naruay dagiti bad records ti dati nga amo na idiay China ngem kuna ni Ong a saanna nga ammo datoy a record.
Maipalagip nga immunan a pinasingkedan ni Ong a ninong na ni Duanren Wu a best friend ti Chinese mother na.
Kabayatanna, kwinestyonaran pay ni Cong. Barbers ni Cassy Ong no sadino ti naggapuan ti kuarta nga inpuonan dagiti kakaduana iti pannakaibangon dagiti pasdek ti Philippine Offshore Gaming Operators idiay Porac ketn direkta a dinamagna no naggapu dagiti kwarta a nagpuonan da iti illegal a droga wenno money laundering.
Iti met biang ni Ong, inpettengna a saan a naggapu iti droga wenno money laundering ti pinagpuonan da iti Philippine Offshore Gaming Operators hub.
