LAOAG CITY – Naiget ita ti panagsagana ti Philippine women’s football team iti kaunaan a gundaway a nakastrek iti finals iti Sea Games kalpasan nga inabak na ti Thailand.
Maiyuswat ti laban ti Filipinas kontra iti defending champion a Vietnam intono Disyembre 17 iti Chonburi Stadium.
Ti Vietnamese, nga inabak ti Pinay booters iti group play iti iskor a 1-0, ket naala na met ti first finals seat na babaen iti 5-0 nga iskor na kontra iti Indonesia iti Final Four iti National Sports University IPE Stadium.
Mainaig iti daytoy, nakaaramid ti Philippine women’s football team ti pakasaritaan gapota immabanse iti finals iti kaunaan a gundaway.
Segun kenni head coach Mark Torcaso, idi damo ket adda ti panagdudua kadagiti players iti Pilipinas ngem naragsak ken ipannakkel na dagitoy gapo ta dimmanon da iti finals.
Inlawlawag na a saan a nagsardeng dagiti umaayam iti kompetisyon gapo ta maysa kadagiti kalikagom da ket umabanse iti gold match nga isu ti naala da kalpasan ti pannakaabak da iti ummuna a laban da.
Kuna met ni skipper Hali Long a naragsak nangruna ket maysa daytoy kadagiti goal da ken ita ket kalikagom da a mangabak iti maudi a laban da iti SEA Games.
