LAOAG CITY- Nakasaganan ti Pilipinas iti Divorce Bill, kalpasan a naipasa iti maikatlo ken maudi a panakabasa na iti Kamara de Representantes.
Iti pannakiuman ti Bombo Radyo Laoag ken ni Atty. Domingo “Egon” Cayosa – Former President ti Integrated Bar of the Philippines, inlawlawagna a ti diborsio ket maysa a linteg a mangwaswas iti kasar dagiti agassawa.
Ti mailunglungalong a gakat ditoy pagilyan ket saan a kas iti sabali a pagilyan a maa-awagan kas “quickly divorce” wenno “no fault divorce” gapu ta ti inaprobaran ti Kamara de Representantes ket specific ken limited laeng.
Maibasar pay laeng daytoy iti daan a Civil code tapno maipalubos ti legal separation, annulment of marriage ken declaration of nullity of marriage a nanayonan laeng ti grounds-na.
Mainaig iti daytoy, kinuna ni Cayosa a napintas daytoy a gakat gapu ta no ag-file ti petitioner iti diborsio ket makatawen laeng ti mauray, saan a kas idi a nasurok a makatawen ken nangina pay.
Inpettengna a nasayaat daytoy kadagiti agassawa a toxic ti relasyon da no sadinno ket maap-apektaran pay dagiti annakda.
Innayonna, a masapol latta nga ikonsiderar dagiti nagannak ti emosyon ken agbalin a trauma dagiti annak da.
Kabayatanna, respetaren met ti abogado ti takder dagiti Religious group, ngem inyunay-unayna a no ti legal a panagsina dagiti agassawa ti solusyon para iti naanayas a biag ket masapol a maipatungpal ti Divorce.
Nupay kasta, inpagaenetget ni Cayosa a saan a gapu ta agbalin a linteg ti Diborsio ket mabalin nga agsinan ti tunggal agasawa, nasken latta a lumasat iti umno a proseso.
