LAOAG CITY – Plano ti gobierno ti Pilipinas nga umutang ti pakabuklan a P2.46 trillion para iti tawen 2024 tapno mapundoan ti P5.77 trillion spending program a target ti executive department nga isuhestyon iti Kongreso.
Daytoy ti kinumpirma ni Budget Secretary Amenah Pangandaman.
Ti plano nga utangen ti gobiero a pundo tapno suportaran ti 2024 budget ket 12% a nangatngato no maidasig iti borrowing program ita a tawen 2023.
Mainaig iti daytoy, inaprobaran ni Presidente Ferdinand Bongbong Marcos Jr. ti National Expenditure Program (NEP) para iti sumaruno a tawen a gagem nga agtultuloy ti panagdur-as ti ekonomiya bayat ti pannakakonsiderar ti inclusivity ken sustainability.
Ti National Expenditure Program ket ti spending plan ti gobyerno para iti sumaruno a fiscal year. Iti oras a maaprobaran daytoy ti Kongreso, daytoy ket maawagan a General Appropriations Bill ken no bilang maipasan kas naan-anay a linteg, daytoy ket maawagan kas General Appropriations Act.
Basar iti Budget Secretary, maisubmitir ti nailungalong a nailian a pundo para iti tawen 2024 iti Kongreso sumagmamano a lawas kalpasan ti maikadua nga State of the Nation Address wenno SONA ti Presidente a naituding intono Hulyo 24.
