LAOAG CITY – Awan ti nasken a pagdanagan ti publiko iti pangta ti Iran nga immatake kadagiti base ti Amerika.
Daytoy ket iti baet ti panagamak a mabalin a mairaman ti Pilipinas iti kumarkaro a tension iti Middle East gapu iti panagbalin a kaalyado ti Amerika.
Inbatad ni Palace Press Officer ken Communications Usec. Claire Castro, mismo a ti National Security Council (NSC) ti nangirakurak nga awan ti base militar ti Amerika ditoy Pilipinas.
Inlawlawagna a dagiti kampo iti babaen ti Enhanced Defense Cooperation Agreement (EDCA) ket kukua ken imatmatonan ti gobierno ti Pilipinas ken saan a kontrolado ti sabali a pagilian dagitoy a pasilidad.
Ginutigot ti gobierno ti publiko nga agtalinaed a kalmado ken agbalin a naridam kadagiti agwarwaras nga impormasion.
Agtultuloy ti pannakikoordinar ti gobierno iti Armed Forces of the Philippines (AFP), Department of National Defense (DND) ken dadduma pay nga ahensia tapno mabantayan ti situasion ken mapagtalinaed ti seguridad ti pagilian.
Iti agdama, inpasingked ti gobierno a nagtalinaed a natalged ti pagilian ken adda iti desision ti Pilipinas ti panangidaulo kadagiti kampo militar iti uneg ti teritorio daytoy.
