LAOAG CITY – Dumanonen iti 9.5 a milyon a Pilipino ti nagsigarilio manipud idi 2021 agingga idi 2023, basar iti datos ti Food and Nutrition Research Institute (FNRI) nga inrakurak ni Senador Sherwin Gatchalian iti panagdengngeg ti Senado seknan iti iligal a negosio ti sigarilio ken vape.
Inbatad ni Gatchalian, ti panagadu dagiti agsigsigarilio ket gapu iti panagbaba ti bilang ti “never-smokers” wenno dagiti saan pay a pulos a nagsigarilio.
Iti 9.5 a milyon nga agsigsigarilio, 6.4 a milyon ti agus-usar ti tradisional a sigarilio idinto a 1.5 a milyon met ti agus-usar ti e-cigarettes.
Bimmaba ti smoking prevalence manipud iti 18% idi 2015 iti 14% idi 2021 ngem naminsan manen a ngimmato daytoy iti 18% idi 2023 a nangikkat iti innem a tawen a balligi kontra iti panagsigarilio.
Binallaagan ni Dr. Maria Encarnita Limpin ti Action on Smoking & Health (ASH, Phil.) a ti panagngato ti bilang dagiti agsigsigarilio ket mangitunda ti ad-adu a kaso ti sakit ken pannakatay gapu iti panagsigarilio.
Insingasingna ti nangatngato a buis iti sigarilio ken e-cigarettes tapno makissayan ti panagusar iti daytoy.
