LAOAG CITY – Adda ti panagamak ni Bombo International News Correspondent Rafael Bitanga, tubo iti ili ti Curimmao ken adda idiay Ithaca, New York gapo ta amangan no saan a makabutos.
Daytoy ket gapo ta naipatulod idiay Alaska ti balota na nga isu ti residensya na idinto nga adda idiay New York isuna kas maysa nga estudyante.
Segun kenni Bitanga, daytoy a paset para kenkuana kas maysa nga estudyante iti sabali nga estado ti Amerika gapo ta saan a dagus a dumanon ti balota na.
Inbatad na a saan laeng nga isuna ti naitantan ti balota na gapo ta ado pay dagiti pada na nga estyudante nga agpapan ita ket saan da pay a naawat ti balota.
Gapo iti daytoy, kalikagom ni Bitanga a daytoy kuma a banag ti makita dagiti maseknan nga opisyales tapno agbalin a patas met laeng para kadakuada ti eleksyon nangruna ket awan da kadagiti pagtaengan da.
Mainaig iti laban para iti kina-presidente, ti obserbasyon ni Bitanga ket saan a napintas ti pannakilangen ni Presidente Donald Trump kadagiti tattao.
Para kenni Bitanga, napigpigsa ni Democratic candidate Joe Biden kadagiti ubbing a botante gapo ta maysa kadagiti prayoridad na ket ti pannaipangato ti 15 a dolyar ti minimum wage ken awan ti nalawag pay a palawag na mainaig iti edukasyon.
Kabayatanna, saan pay a maibaga ni Bitanga iti agdama no ni Trump wenno ni Biden ti ibutos na gapo ta masapol a mabuya na pay laeng ti naudi a debate da ken kitaen na no siasinno ti makatulong iti komunidad, iti pamilya na ken isuna kas maysa nga estudyante.
