LAOAG CITY – Nagballigi ti maysa a Pinay a ni Islay Erika Bomogao ti Baguio City iti babaen ti knockout kontra ken ni Klinphaka Por Thaisong iti Bangkok.
Iti umuna a round, narigatan ni Bomogao ti naadayo a kugtar ti kalabanna ngem nakabales daytoy iti maikadua a rikos usar iti natadem a sikona.
Iti maikatlo a rikos, nangiparuk-at ti napigsa a kannawan a danog a nangitupak iti Thai fighter.
Nagsardeng ti laban kalpasan ti 13 a segundo ti round ken nabigbig ni Bomogao kas nangabak iti laban.
Nakagun-od daytoy ti $100,000 a kontrata ken extra performance bonus.
Iti pannakangabakna, agtalinaed a nadalus ti rekordna a 5-0 ken ad-adda a nabigbig isuna iti sangalubongan nga tay-ak ti Muay Thai.
