LAOAG CITY – Nalpasen ti kampania ni Pinay tennis star Alex Eala iti 2026 US Open kalpasan nga inatiw ti American player a ni Iva Jovic iti round 3.
Mainaig iti daytoy, napintas ti nagbalin a rugi ti laban para iti dua a player.
Kalpasan ti rally, immuna a nagun-od ni Jovic ti umuna nga set iti score a 7-5.
Insigida met a nagsubbot ni Eala iti maikadua nga set, ad-adda nagbalin nga agresibo ni Pinay tennis star ken naala ti momentum gapuanan a nakontrolna ti ay-ayam ken nagun-od ti set iti score a 6-3.
Iti deciding set, nagpakita manen ti napintas nga ay-ayam ni Eala ken nakaala ti nasapa a 2-0 a lamang ngem insigida a nakasubbot ni Jovic ken naitabla ti laban iti score a 2-2.
Kabayatanna, iti maudi nga ay-ayam, nileppas ni Jovic ti deciding set iti score a 7-5 a nangitunda ti panag-abantena iti sumaruno a round.
Gapu iti daytoy, saanen nga immabante ni Eala iti round of 16 ti torneo ken nalpasen ti kampaniana iti 2026 US Open.
