LAOAG CITY – Maluksaw ti pamilya Cabaya kalpasan a natakaw ti taraken da a lima a burias ken dua a mabalin a ma-lechon iti Barangay Puttao iti ili ti Solsona.
Segun ken ni Mr. Kevin Cabaya, adayo da iti ayan dagiti taraken da gapu ta ti pagnanaedan da ket iti Barangay Laureta iti ili ti Solsona.
Inbatad na a naduktalan da laengen nga awan dagiti taraken da idi mapan agpakan ti ama na idi kalman iti oras ti alas-7:30 ti bigat.
Kuna na a sakbay a napukaw dagiti taraken da ket nakita dagiti nagannak na nga adda ti uppat a lallaki a napan nagkalkali iti igid ti pagtaraknan da ti baboy.
Innayon na nga iti panaginspeksyon da iti lugar ket nakita da nga adda ti tugot ti 4-wheels idinto a putputong ti lugar nga ayan dagiti taraken da.
Inpakaammo ni Cabaya a ginatang da dagiti taraken da iti 4,500 a pisos iti kada burias.
Innayon na a kalpasan a naduktalan da ti pannakatakaw dagiti taraken da ket nakikoordinar da a dagus kadagiti kabangibang da a barangay ken inreport da pay ti napasamak iti Philippine National Police iti ili ti Solsona.
