LAOAG CITY – Natiliw dagiti pito nga indibidual gapu iti illegal a panagsusugal da maysa a minatayan iti paset ti Sitio Sinamar, Barangay Elizabeth iti ili ti Marcos.
Nabigbig dagiti suspek nga isuda Randy Bayudan y Rabang; Roel Diego y Julian; Arturo Malinit y Raza Jr; Maynard Monje y Raza; Fitzgerald Fernando y Julian; Mark Jhay Fernando y Bayudan, agpapada dagitoy a residente iti Barangay Elizabeth ken ni Ranel Magno y Barit, taga Brgy Ferdinand iti metlaeng nadakamat nga ili.
Nakumpiskar dagiti otoridad iti lugar ti 40 a pedaso ti baraha, 7 a monoblack chair; 2 a pinggan; maysa a brown plastic table; maysa a table blanket; ken ti maipagarop a pusta dagiti suspek a P6,030.00
Immuna iti daytoy, nangisayangkat ti Anti-Illegal Gambling operation dagiti kameng ti Philippine National Police iti ili ti Marcos kalpasan a nakaawat da nga adda ti agsusugal iti nasao a minatayan no sadinno a ditoy a naaktwan da dagiti suspek nga agay-ayam ti “Lucky 9”.
Manamnama nga ita nga aldaw ti pannakaipila ti kaso seknan iti panaglabsing iti Presidential Decree (PD) 1602 kontra kadagiti suspek.
