LAOAG CITY – Inbatad ni ABC Federated President Mikee Fariñas ditoy ciudad ti Laoag nga awan ti pagbaliwan ti plete iti tricycle iti baet a lima laeng a tricycle ti mapalubusan nga agpasada iti kada barangay.
Kuna na a makaammon dagiti traysikelan nga agtutulag no siasinno kadakuada ti agpasada iti kada aldaw.
Segun ken ni Fariñas, masapol a maysa laeng ti ilugan ti kada tricycle ken no ania ti agdama a plete ket isu ti masurot.
Inlawlawag pay ti ABC Federated President a no ania ti pagluganan a tricycle a mapan iti sentro ditoy ciudad ket isu met laeng ti pagluganan nga agawid.
Innayon na a no mabayag iti papanan ken saan a maiyuray ti nagluganan a tricycle ket masapol a no agawiden ket tumawag met laeng ti tricycle iti naggapwan a barangay tapno isu ti mapan mangala iti maseknan.
