LAOAG CITY – Inpasingked ni P/Maj. Antonio Marzan, Hepe ti Bacarra Municipal Police Station a mangiwaywayatda ti naun-uneg nga imbestigasion dagiti napasamak a panagtatakaw iti nasao nga ili.
Segun kenkuana, addan ti tallo a pagadalan ti naserrek dagiti saan pay a nabigbig a suspek pakairamanan iti Tambidao Elementary School, Pasiocan Elementary School ken Buyon Elementary School iti kallabes.
Inbatadna basar iti naiwayat nga imbestigasion ket agpapada a Principal’s Office ti natakawan kadagiti maseknan a pagadalan.
Inlawlawagna nga ikarigatanda a biruken dagiti adda iti likudan iti nasao nga insidente tapno matiliw dagitoy ken mapatawan ti maiyannatop a pannusa.
Innayonna a mapaigetan ti panagpatrolya dagiti kapulisan tapno saanen a maulit ti napasamak a panagtatakaw.
Maipalagip a ti naudi a naserrek ket ti Buyon Elementary School no sadinno natakaw iti Principal’s Office iti nasao a pagadalan ti printer, laptop ken sumurok-kumurang lima a ribu a pisos.
