LAOAG CITY – Naminsan manen nga inkalintegan ti Philippine National Police ti iwaywayatda nga ‘Oplan Katok’ para iti pananglaban kadagiti saan a rehistrado a paltog.
Inbatad ni Philippine National Police Chief Gen. Rommel Marbil a daytoy a tignay ket nakailanad iti linteg ken proactive initiaitive tapno maipasigurado ti panagbalin a responsable nga agtagikua ti paltog.
Inpettengna a saan daytoy a maysa a klase ti pammutbuteng kadagiti pulitiko gapu iti umas-asideg nga eleksion.
Inlawlawagna a ti nasao nga addang ket naipalaon iti Comprehensive Firearms and Ammunition Regulation Act.
Kunana a mangipatulod ti surat ti kapulisan iti maysa a tao a kasapulanna nga ipabaro ti nag-expired a pannaka-iparehistro ti paltog wenno i-surrender pay laeng dagitoy kabayatan a saan pay a naiparehistro.
Maipalagip nga inrekomendar ti Commission on Election nga isuspenso ti Philippine National Police ti nasao a programa tapno saan a mausar iti panangpulitika.
