LAOAG CITY – Inadmitir ti Philippine National Police-Criminal Investigation and Detection Group (PNP-CIDG) a marigatanda a mangbirok iti dati a Presidential Spokesman a ni Atty. Harry Roque.
Segun ken ni Criminal Investigation and Detection Group Spokesperson Lt. Col. Imelda Reyes, adda ti lead-da iti lugar nga ayan ni Roque ngem alisto daytoy nga umakar apaman a maiwayat ti pannakaarestarna.
Inbatad ti Bureau of Immigration a saan pay a nakatalaw ditoy pagilian ni Roque ken awan ti record-da a nagbiahe daytoy.
Ni Roque ket na-cite in contempt ti Quad Comm ti Kamara idi Setiembre 13 kalpasan a nagkedked nga agisubmitir kadagiti dokumento a mangilawlawag iti panagngato ti kinabaknangna.
Inawagan ni Roque a “power tripping” ti quad comm kageddan ti contempt ken arrest order a naiparuk-at kontra kenkuana gapu iti maipagarup nga adda ti pakainaiganna kadagiti iligal nga operasion ti Philippine Offshore Gaming Operators (POGO).
