LAOAG CITY – Mamati ni Ilocos Norte Police Provincial Director, Sr Supt Jose Melencio Nartates Jr nga napasamak ti illegal online gaming iti Fort Ilocandia Resort Hotel kadagiti kallabes nga aldaw.
Kuna ni Nartates, ipaneknek daytoy dagiti nakumpiskar nga gadgets ken dadduma pay nga ebidensiya kas ti computer, flash drives wenno ti nasurok nga 30 USB, adu nga ID nga addaan ti Chinese markings, ID pictures dagiti gangannaet, cellphones ken dadduma pay.
Inbatad ti opisyal nga dagiti nakumpiskar nga ebidensiya ket maidalan ti forensic examination.
Inlawlawag na a sakbay nga inwayat da ti raid ket adda naala da nga impormasyun ken ebidensiya ken nangiwayat da pay ti validation ken kalpasan na ket nangala da ti search warrant.
Kinumpirmaran ni Nartates nga kinadua da ti sumagmamano a pannakabagi ti Department of Justice ken Cybercrime Division ti PNP iti panangiwayat da ti raid.
Malagip nga iti kallabes ket kellaat a nagpapanaw dagiti Chinese nationals nga naka-check-in iti Hotel B ti Fort Ilocandia kalpasan ti damag nga nasurok a 1,000 nga Chinese nationals ti natiliw idiay Fontana gapu ti maipagarup nga online gaming.
