LAOAG CITY – Inbilin ni Philippine National Police (PNP) chief Police General Jose Melencio Nartatez Jr. ti panangpapigsa ti presensia dagiti pulis ken panagsagsagana dagiti kameng ken kagamitan para iti panangsolbar iti epekto ti Bagyo Inday kadagiti sumagmamano a paset ti pagilian.
Iti baet a saan a direkta a dimmuprak iti kadagaan, nangitunda ti bagyo ti panagreggaay ti daga ken panaglayos ti sumagmamano a lugar, partikular iti Visayas ken Mindanao a nakatayan ti 18 nga indibidual idinto a 14 pay ti mapukpukaw.
Inbatad ni Nartatez nga agtaltalinaaed nga aktibo ti Philippine National Police iti search and rescue operations, clearing operations, panangipaay ti ayuda ken dadduma pay nga addang para kadagiti apektado ti kalamidad.
Immunan a naipan iti heightened alert status dagiti police unit iti intero a pagilian tapno insigida a makaresponde kadagiti agkasapulan.
