LAOAG CITY – Balligi a nagresponde dagiti kameng ti Pasuquin Municipal Police Station iti iligal a panagkalap ti maysa a barito babaen ti 911 hotline.
Segun ken ni P/Capt. Dondon Dumalag, Deputy Chief of Police iti nasao nga ili, nakita ti kapulisan ti maseknan a barito a mangiwaywayat ti iligal a panagkalap iti kabaybayan iti Barangay Salpad iti ili ti Pasuquin.
Nupay kasta, inlawlawagna a saan a naipursige ti pannakaipila ti kaso kontra iti nasao nga indibidual gapu iti kinakurang ti ebidensia kas maibasar iti korte.
Inbatadna a nakumpiskarda dagiti kagamitan nga inusar ti barito kas ti baterya, inverter nga addaan ti 220 volts ken dadduma pay.
Mainaig iti daytoy, kuna ni P/Capt. Dumalag a napintas ken epektibo iti panangipatungpal ni Presidente Ferdinand Marcos Jr. ti 911 hotline tapno al-alisto a makapagresponde dagiti otoridad kadagiti insidente wenno krimen.
Innayonna a nakapagresponde ti kapulisan iti lugar iti uneg laeng ti sumurok-kumurang dua a minuto gapu iti kinapaspas ken kinaalerto dagitoy.
