LAOAG CITY – Agkiddaw ti Philippine National Police (PNP) iti ili ti San Nicolas ti tulong dagiti eksperto tapno mailawlawag ti resulta ti imbestigasyon da seknan kadagiti nakuryente a dua a lineman ti Ilocos Norte Electric Cooperative (INEC) iti kallabes.
Daytoy ti inbatad ni Police Major Paul Benedict Parado, ti chief of police iti ili ti San Nicolas iti eksklusibo nga interview kenkuana ti bombo radyo.
Kuna ni Parado nga adda dagiti termino nga inusar dagiti agarop 10 empleado ti kooperatiba nga inimbestigar da a saanda a maawatan.
Segun ken ni Parado, awan ti nalawag a rason ti nakakuryentian dagiti dua nga empleado kas ti inbaga ti INEC a naggapo iti generator ti nakakuryente kadagiti biktima.
Inpakaammo na nga apaman a makaala da ti eksperto a makailawlawag iti daytoy ket paayaban danto met ti pamilya dagiti pimmusay a lineman ti INEC.
