LAOAG CITY – Inlawlawag ni Police Major Paul Benedict Parado, ti chief of police ti PNP-San Nicolas no kasano a dimmatag iti istasyon ti pulisya ni Gian Tito Taylan y Arizabal, addaan ti umno a tawen ken residente iti Barangay 15, San Jose, San Nicolas, Ilocos Norte.
Daytoy ket kalpasan ti panagpaputok na ti paltog a maysa a Cal. Super 38 Revolver nga addaan ti serial number a 801144.
Segun kenni Parado, kabayatan ti hot pursuit operation ket nakumbinsir da a sumuko iti kwerpo ti pulisya iti nasao nga ili ni Taylan kalpasan ti maipagarop a panagpaputok na ti paltog.
Ummunan a naglikudan ni Taylan nga isuna ti nagpaputok ti paltog ngem inbatad ni Parado a mapaneknekan dagiti pulis a daytoy ti kinamat da.
Maipalagip nga adda ti naireport a nagpaputok ti paltog iti nadakamat a lugar ken iti panagresponde dagiti otoridad ket nakita da ti suspek a nakalugan ti motorsiklo ken sakbay a pinataray na ti lugan na ket adda ti inpurwak na a paltog.
Narekobre dagiti otoridad iti lugar ti maysa nga unit ti Smith and Wesson Cal. Super 38 Revolver nga addaan ti Fired Cartridge Case ken dua a bala na.
Kabayatanna, kuna ni Barangay Chairman Jovani Taylan iti Barangay 15 iti nasao nga ili nga awan ti monitor na iti kabsat na a ni Gian bayat ti napasamak ti panagpaputok.
Kunana nga awan met ti nagbalin a rekord ni Gian iti barangay seknan iti panagpaputok ti paltog ken mamati nga awan ti ik-ikotan ti kabsat na nga anyaman a paltog.
