LAOAG CITY – Dimmawat ti pammakawan ni Pol. Col. Lt. Andrew Rabang, ti Chief of Police ditoy ciudad ti Laoag kenni Vice Mayor Rey Carlos Fariñas.
Segun kenni Vice Mayor Fariñas, nagturong a mismo ni Rabang iti opisina na tapno dumawat ti pammakawan.
Kunana a ti nagbalin a palawag ti hepe kenkuana ket “wrong choice of words” dagiti nailanad iti surat isut gapuna a nagpadespensar.
Mainaig iti daytoy, kuna ni Fariñas a maawatan na ti sitwasyon ni Rabang ngem pinalagipan na lang daytoy nga awan iti ania man nga otoridad da a mangiserra kadagiti kalsada ditoy ciudad ti Laoag.
Innayon na nga agsungbat to lattan ni Rabang iti korte tapno malawlawagan no siasino iti usto kadakuada, no sadinno a nadakamat ti bise mayor a no maduktalan nga isuna ti nagkamali iti pannakaawat na maipanggep kadagiti road closure ket isunto met ti dumawat ti pammakawan iti chief of police.
Innayon ni Farinas a dakkel ti respeto na kadagiti uniformed personnel gapu ta inarapaap na met ti agbalin a kas maysa a soldado.
Maipalagip a nangipila ti kaso nga adminstratibo ni Vice Mayor Fariñas kontra kenni Pol. Col. Lt. Rabang kalpasan a saanna a nagustwan ti nagbalin a sungbat na iti panangdillawna ti panangpaserra da iti kalsada ditoy ciudad.
