LAOAG CITY – Ibilang ni Police Lt. Col. Joseph Baltazar, ti Officer-In Charge ditoy ciudad ti Laoag a dakkel a karit kenkuana ti panagtugaw na kas mangidaulo iti Philippine National Police (PNP) ditoy ciudad.
Inlawlawag na a ti ciudad ket isu ti maibilang a rupa ditoy Ilocos Norte isut gapuna nga aniaman ti mapaspasamak iti ciudad ket apektado ti sibubukel a probinsya.
Segun kenni Baltazar, ti immuna nga inaramid na apaman a naipatugaw kas baro a mangidaulo iti Philippine National Police ditoy ciudad ket ti nakitaripnong kadagiti personnel iti nasao a kwerpo ti pulisya.
Malaksid iti daytoy, inrebisar da a dagus dagiti pending a kaso tapno masolbar da iti kabiitan a panawen.
Inpasingked ni Baltazar nga itultuloy na ti pannakadalos ti illegal a droga ditoy ciudad ken inpasigurdo na ti pannakaipaay ti naan-anay a seguridad kangrunaan na ket mapaspasangasangan ti pannakaiyuswat ti Pamulinawen Festival.
Sinukatan ni Baltazar ti dati a chief of police ditoy ciudad a ni Police Lt. Col. Joemar Labiano.
