LAOAG CITY – Mamati ti Philippine National Police – Police Regional Office 11 a maarestarda ita nga aldaw ti aglemlemmeng a wanted person a pastor a ni Apollo Quiboloy ken dagiti padana nga akusado.
Segun ken ni PBGen. Nicolas Torre III, agtultuloy ti panangbirukda iti uneg ti Kingdom of Jesus Christ compound iti mapapati nga adda iti uneg daytoy ti aglemlemmeng a pastor.
Nagpanawagan daytoy ken ni Quiboloy a sumuko ken saanen a parigaten pay dagiti supporters ken sumursurot kenkuana.
Iti agdama, bantay sarado ti pulisia iti sibubukel nga aglawlaw ti compound idinto a maiserbi ti warrant of arrest kontra kadagiti akusado.
Inbatad pay ni PBGen. Torre III nga iti agdama ket naannayas dagitoy a makagargaraw iti uneg ti compound ti Kingdom of Jesus Christ.
