LAOAG CITY – Saan a nagpangadua ni Police Master Sergeant Razel Go, imbestigador iti Philippine National Police iti ili ti Pinili, a nangpa-breastfeed iti maysa a pito a bolan na paylaeng a maladaga kabayatan ti panangisayangkat da ti barangay visitation.
Inlawlawag na nga iti panagturong da iti maysa a balay ket adda ti maladaga nga agsangsangit ken kas ti makunkuna a ‘mother’s instinct’ ket ammona a mabisin ti ubing.
Kuna na nga iti pannakisarita da iti lola ti ubing ket naamoan da nga awan ti ina na gapu ta adda ti inasikaso na iti ruwar.
Gapu iti daytoy, inbatad ni Go a kinasarita na nga immuna ti lola ti ubing sakbay a pina-breastfeed na daytoy.
Inpakaammo ni Go nga adda met ti 10 a bolan na paylaeng nga anak na isut gapuna nga ado ti gatasna.
Innayon na a daytoy ti damo nga adda ti pina-breastfeed na a saanna nga anak.
Kabayatanna, inrakurak ni Go nga inaldaw da a mangisaysayangkat ti barangay visitation tapno palagipan dagiti residente kadagiti paglintegan tapno maliklikan ti anianam a krimen, aglalo ti pagabuso kadagiti babbai ken ubbing.
