LAOAG CITY – Naikkat ken sumango pay iti kaso dagiti election watchers a naaktuaran a nakita iti maysa a bidyu nga agshe-shade ti balota dagiti botante iti maysa a polling precinct idiay Abra kabayatan ti eleksion.
Daytoy ti kinumpirmaran ni Commission on Elections Chairman George Erwin Garcia.
Nakadanon ken ni Garcia ti maysa a Facebook video no sadinno a makita ti dua nga election watchers, a maysa a lalaki ken maysa a babai kabayatan nga agshe-shade ti balota dagiti botante.
Iti nag-viral a bidyu a nai-post iti Facebook ti maysa a Joy Bernos, mangngeg ti maysa a babai nga agrep-report mainaig iti insidente.
Iti baet nga agrep-report ti nasao a babai ken mangal-ala ti bidyu ti insidente ket maipagarup nga intultuloy latta dagiti nadakamat a poll watchers iti panag-shade iti balota dagiti botante.
Kabayatanna, makita pay iti bidyu ti maysa a watcher nga agus-usar ti selpon iti uneg ti polling precinct.
