LAOAG CITY – Pormalen a nalukatan ti Pre-National Qualifying Meet ti Palarong Pambansa ditoy Ilocos Norte.
Nabara a sinarabo ni Gov. Matthew Marcos Manotoc dagiti nasurok-kumurang maysa a ribu nga atleta manipod iti rehiyon uno, dos, tres ken Cordillera Administrative region nga agbibinnalubal kadagiti nagduduma nga ay-ayam.
Iti panagbitlana, inpasigurado ni Gov. Manotoc ti kinatalged dagiti amin nga umaayam kabayatan ti panagtalinaed dagitoy ditoy probinsia.
Mainaig iti daytoy, inbatad ni Mr. Eric Aguilar, Sports Coordinator ti Deparment of Education – Ilocos Norte, dagiti top 2 iti tunggal team events ket kwalipikado iti Palarong Pambansa idinto a dagiti mangabak iti individual events ket makastrek dagus iti nasao a kompetisyon a maiyuswat intono Hulyo 29 agingga Agosto 5 idiay Marikina City.
Kunana a maisayangkat dagiti ay-ayam kas ti basketball iti Laoag City Ampitheater, Centennial Arena ken Laoag City Gymnasium. Ti baseball ket iti Bacarra Comprehensive High School. Futsal iti Sarrat Civic Center. Sepak Takraw iti San Nicolas Amphi-Theater. Football iti Northwestern University. Softball iti Bacarra National Comprehensive High School idinto ti volleyball met ket iti Divine Word College of Laoag.
Malaksid iti daytoy, nagatendar pay iti nasao nga event ni Ilocos Norte 1st District Rep. ken Presidential Son Ferdinand Alexander “Sandro” Marcos III no sadino indanonna ti nabara a panangkablaawna kadagiti delegado.
Naammoan a daytoy ti kaunaan a gundaway a nagbalin nga host ti Ilocos Norte para iti Pre-National Qualifying Meet ti Palarong Pambansa.
Kabayatanna, mangrugi ita nga aldaw Hulyo 18 mangrugin ti laban agingga intono Hulyo 21.
