LAOAG CITY – Indanun ni Assistant Secretary Damphne Du-Naga, iti DTI national office ti mensahe ni Presidente Rodrigo Duterte para kadagiti Micro, Small and Medium enterprises (MSMEs).
Daytoy ket mainaig ti panagkalikagum ni Presidente Duterte a matulongan a dumur-as dagiti babassit a negosyante ditoy pagilyan.
Inbatad ni Du-Naga a daytoy ti rason nga inkarigatan na iti nagatendar iti launching ti One Town One Product (OTOP hub) iti departure area ti Laoag International Airport ditoy ciudad ti Laoag.
Segun kenni Du-Naga, babaen ti OTOP Hub ket ad-adda a maiyam-ammo dagiti nagduduma a produkto dagiti Pilipino, saan laeng a ditoy probinsya no di ket iti nagduduma a probinsya.
Kinontra ni Du-Naga dagiti maibagbaga a dagiti tagilako iti OTOP hub ket nangingina.
Naamuan ti Bombo Radyo manipud kenni Mrs. Charie Quodala, provincial director ti DTI Ilocos Norte a libre iti panagpuesto ti OTOP Hub iti airport gapu ta adda iti memorandum of agreement iti nagbaetan ti nasao nga ahensya ken CAAP.
