LAOAG CITY – Inbilin ni Presidente Ferdinand R. Marcos Jr. iti amin a maseknan nga ahensya ti gobierno nga iprayoridad ti kalidad, kinatalged ken kinatibker dagiti materyales nga us-usaren para iti infrastructure projects.
Inpaay ni Presidente Marcos Jr. ti direktiba iti Department of Public Works and Highways (DPWH), Department of Transportation (DOTr), Department of Trade and Industry (DTI), ken dadduma pay a maseknan nga ahensya ti gobierno.
Kagiddan iti daytoy, inpetteng ti presidente a kasapulan nga ilungalong ti ‘climate and disaster resilient infrastructure’ aglalo ket masansan nga addan ti dumuprak a bagyo iti pagilian.
Mainaig iti daytoy, pinatibker manen ni Presidente Marcos ti naan-anay a kinasagana ti administrasyon para iti kalamidad ken inpetteng na ti commitment na a pasayaaten pay dagiti addang tapno malabanan ti potensyal nga epekto ti climate change.
Nagpanawagan pay ti presidente iti publiko iti naan-anay a kooperasyon ken tulong tapno awan ti mabati iti pananglaban kadagiti karit a gubuay ti panagbalbaliw ti klima.
