LAOAG CITY – Desidido ni Presidente Ferdinand Marcos Jr. a maikkat dagiti fixers kadagiti nagduduma nga opisina ti gobierno.
Inbatad ni Marcos nga arig nagbalinen a paset ti sistema iti pannaki-transaksion kadagiti government offices ti dimmalan kadagiti fixers tapno masolbar ti nakabaybayag a panaguray iti pila nga umab-abot iti sumagmamano nga oras.
Mamati ti Presidente nga adda ti panagkunsabo a mapaspasamak iti kastoy a set up partikular iti nagbaetan ti fixer ken ti maysa nga insider nga agtrabtrabaho iti maysa nga opisina ti gobierno.
Inlawlawagna nga aggudua dagitoy ti maaw-awatda a tandang manipud iti maysa a kliente nga ar-aramiden a transaksion.
Inpettengna a kalikagumna a maikkaten ti kastoy a wagas a nagbalinen a paset ti bureaucracy.
Innayonna a ti solusion iti daytoy ket ti pannakaipatungpal ti digital transaction kadagiti amin a government offices a saan laeng tapno maikkaten ti fixers no diket al-alisto pay iti pannakaiproseso dagiti transaksion iti gobierno ken maliklikan ti “person to person contract.”
