LAOAG CITY – Kalikagom ni Presidente Ferdinand Marcos Jr. nga ipangatu ti service recognition incentives wenno SRI kadagiti public school teachers.
Ti service recognition incentives ket ti tinawen a financial incentive a maipapay kadagiti empleado ti gobyerno kas panangbigbig iti commitment ken dedikasyon da iti panangipaay ti serbisyo iti publiko.
Manipud iti P18,000, target ti Malakanyang a buklen a P20,000 ti maited kadagiti nasurok maysa a milyon a DepEd personnel.
Immannamong met ni Department of Education (DepEd) Sec. Sonny Angara iti ganuat ti Presidente gapu ta mangipakita laeng daytoy ti panangbigbig kadagiti manursuro.
Mainaig iti daytoy, binilin ni Pres. Marcos ti Department Budget and Management ken ti Department of Education a mangiyalokar ti pondo para iti service recognition incentives increase tapno saan a makaapektar iti fiscal responsibilities ti gobierno.
Kabayatanna, manamnama a pormal nga iyanunsyo ti Malacañang daytoy a ganuat apaman a maipinal ti Department Budget and Management ken Department of Education ti funding mechanisms.
