LAOAG CITY – Inreport ni Bombo International Correspondent Edmond Barayuga, taga San Nicolas, Ilocos Norte ngem agdama nga agnanaed idiay Texas, USA a maibilang a “neck-to-neck” ti survey ti presidential election iti Estados Unidos.
Inbaga na a basar iti survey ket apagapaman a bimmaba ni US President Donald Trump, ngem saan unay a patien dagiti tattao ti resulta gapu iti kaadon dagiti agwarwaras a peke a damag.
Kuna na nga iti Texas ket Republican States isut gapuna a napigpigsa pay laeng ni Trump iti nasao nga estado ngem ti kalaban na a ni Democratic nominee Joe Biden.
Mainaig iti daytoy, inpakaammo ni Barayuga nga awan met dagiti dadakkel a timpuwar a problema kabayatan ti panagbotos dagiti tattao malaksid iti pannakaiserra ti maysa a presinto gapu iti kaadda ti kaso ti covid-19.
Inpakaammo na nga ado dagiti naluksaw ken nadismaya gapu ta saan da a nakabotos no sadinno a naglangan da pay iti trabaho da tapno laeng makapan da agbotos.
Kabayatanna, inbaga ni Barayuga a no maipanggep iti panangimanihir ni Trump iti covid-19 pandemic ket awan ti sapulen da gapu ta ikarkarigatan ti administrasyon na ti mangipaay ti tulong kadagiti umili kas iti panangipaay ti gobierno ti stimulus package ken dadduma pay.
Innayon na nga awanen ti sabali a maibato da ken ni Trump no saan a ti ibagbaga ti kalaban na a saan a naurnus ti panangimanihir na iti covid-19 pandemic iti Amerika.
