LAOAG CITY – Pinirmaan ni President Donald Trump ti maysa nga executive order a mangipataw iti sanction kontra iti International Criminal Court.
Daytoy ket gapu ta ak-akusaran na ti International Criminal Court kadagiti illegal ken awan ti pagibasaran nga addang a puntirya na iti Amerika ken ti nasinged a kaalyado na, ti Israel.
Ti nasao nga addang ket mangpaiget iti financial ken visa restrictions kadagiti indibidual ken ti pamilya da a mangasistir iti imbestigasyon ti International Criminal Court kontra kadagiti American citizens wenno kaalyado da.
Naamoan a ti nasao nga addang ket pinirmaan ni Trump bayat iti ibibisita ni Israeli Prime Minister Benjamin Netanyahu iti Washington.
Maipalagip nga idi Nobyembre iti napalabas a tawen ket nangiparuk-at ti International Criminal Court ti arrest warrant kontra ken ni Netanyahu gapu iti maipagarop a war crimes iti Gaza, banag a naglikudan ti Israel.
Malaksid ken ni Netanyahu ket nangisyu pay ti International Criminal Court ti warrant para met iti Hamas commander.
Kabayatanna, kinondenar ti International Criminal Court (ICC) ti inpataw a sanction ti Estados Unidos, ngem inkari na nga itultuloy da ti trabaho da kangrunaan na ti mangipaay ti hustisya.
