LAOAG CITY – Nagballaag ni President William Ruto kadagiti residente idiay Kenya iti possible a panagpasar da ti kaunaan a bagyo ita a tawen.
Iti agdama ket agpaspasar ti kadakkelan a paset ti Kenya ti layos ken landslides a nakaapektaran ti ginasut a ribo a tattao.
Basar kadagiti opisyal, mapatta-patta nga umaboten iti nasurok a 200 a tattao ti natay idiay Kenya sipud idi Marso idinto a 99 a sabsabali dagiti nagtalinaed a mapukpukaw.
Inpalgak ni Kenyan President Ruto a manamnama nga ad-adda pay a kumaro ti sitwasyon iti pagilian da kadagiti sumarsaruno nga aldaw gapu kadagiti extreme weather.
Inpakaammo ni Ruto a ti cyclone a napanaganan ti Hidaya ket mabalin a tumama iti pagilian da iti aniaman nga oras a mangitunda ti napigsa a tudo ken angin a napeggad unay.
Mainaig iti daytoy, inbilin ni President Ruto a mapaserraan amin dagiti pagadalan iti nadakamat a pagilian gapu iti mapaspasaran da a napigsa a tudo.
