LAOAG CITY – Ginutigot ni Presidente Ferdinand “Bongbong” Marcos Jr. iti publiko nga agin-inot iti danum kas panagsagana iti epekto ti El Niño phenomenon iti pagilian.
Inaramid ni Marcos ti panawagan iti maikadua nga State of the Nation Address-na bayat ti panangipakaammona iti publiko iti panagsagana ti gobierno para iti dry season, nangruna iti sektor ti agrikultura.
Kinuna ni Marcos a nangikabil ti gobierno iti 6 a ribu a rainwater collection facilities iti intero a pagilian kas panagsagana iti dandani a panagtikag gubuay iti El Niño.
Inlawlawagna a tapno masigurado ti seguridad ti danum iti pagilian, dinakamat manen ni Marcos ti panagkasapulan iti Department of Water Resource Management.
Idi Abril, nangipaulog ni Marcos iti Executive Order a nangbukel iti Water Resource Management Office iti babaen ti Department of Environment and Natural Resources.
Nailanad iti Section 2(a) ti EO 22 a ti Water Resource Management Office ket “ipastor ken kampeon, agraman ti Presidential Legislative Liaison Office, ti pannakaipaulog ti linteg a mangparnuay iti apex body kas iti naisingasing a Department of Water wenno regulatory commission on water.”
Iti daytoy a tawen, kinuna ni Marcos a nangilatang ti gobierno iti P14.6 billion para kadagiti proyekto ti suplay ti danum a pakabenepisiaran dagiti komunidad.
Innayonna nga addanto “significant boost” iti suplay ti danum iti National Capital Region ken iti probinsia ti Rizal kalpasan ti umuna a paset ti Wawa Bulk Water Supply Project.
Mainaig iti daytoy, ad-adda nga umadu ti suplay ti danum kadagiti nadakamat a lugar bayat a sumrek ti proyekto iti maikadua a paset.
Maipalagip nga idi Marso, inadmitir ni Marcos a mapaspasaran ti Pilipinas ti krisis ti danum.
