LAOAG CITY – Kalikagom ni Presidente Ferdinand ‘Marcos Jr. ti long-term solutions no maipapan kadagiti natural calamity, karaman ditoy ti “The Big One” wenno maysa a 7.2 magnitude a gingined a mabalin a tumama iti pagilian.
Daytoy ti rakurak ni Office of Civil Defense Undersecretary Ariel Nepomuceno iti press briefing iti Malakanyang kalpasan a nasaludsud mainaig iti direktiba ni Presidente Marcos maipanggep kadagiti napipigsa a gingined.
Kuna pay ni Nepomuceno a kalikagom ti presidente nga isagana ti pagilian para kadagiti dadakkel a kalamidad.
Immunan nga inrakurak ti Office of Civil Defense a saan pay a nakasagana ti Pilipinas no tumama ti “big one” a possible a kapigsa ti magnitude 7.7 a gingined a timmama idiay Myanmar.
Inlawlawag ni Nepomuceno a nupay ammo dagiti Pilipino ti “duck, cover and hold” ket kurang paylaeng daytoy a panagsagsagana ken kinatalged dagiti imprastraktura ti pagilian.
Inpetteng ni Usec. Nepomuceno a kasapulan pay a dumalan iti retrofitting wenno pannakapatibker dagiti pagadalan ken health centers iti Pilipinas tapno kabaelan na dagiti napipigsa a gingined.
