LAOAG CITY – Inawagan ni Presidente Ferdinand “Bongbong” Marcos Jr. kas “professional liar” ken inladawanna kas jukebox ni dati a Philippine Drug Enforcement Agency Investigation Agent Jonathan Morales.
Maipalagip nga inakusaran ni Morales ni Presidente Marcos ken iti aktres a ni Maricel Soriano a maipagarup nga agus-usar ti iligal a droga kas maibasar iti nag-leak a dokumento idi tawen 2012.
Inbatad ni Marcos iti maysa nga ambush interview iti panagbisita daytoy iti General Santos City, kunana nga awan ti serserbina dagiti ibagbaga ni Morales nga am-ammo kas professional liar.
Inlawlawagna nga adda dagiti kaso daytoy a false testimony isu a narigat a patien nangruna ket iti kinaulbod ti arig pagbiaganda.
Inladawan ti Presidente ni Morales kas maysa a jukebox a kayatna a saoen ket itennagan ti kuarta tapno makanta ti kayatna a kanta.
Immuna metten a sinita ni Senate President Juan Miguel Zubiri ti agtultuloy a panagdengngeg iti Senado maipapan iti ‘PDEA leaks’ ken pinalagipanna dagiti kakaduana nga agbalin a naannad nangruna no awan ti ebidensia tapno saan a mausar iti pulitika.
