LAOAG CITY – Ginutigot ti Presidente ti Filipino Community idiay Iran ken Bombo International News Correpondent Marie Grace Melendres iti nasurok innem a ribu a Pilipino iti nadakamat a pagilian a saanda a mapan kadagiti crowded areas iti baet ti tension iti nagbaetan ti Iran ken Israel.
Segun kenkuana, uray awan ti pakaammo kadakuada manipud iti gobierno ti Iran wenno iti embahada ti Pilipinas iti nasao a pagilian maipapan iti plano ti Iran a mangraut iti Israel, nasaysayaat no nakasaganada iti aniaman nga oras.
Inbatadna a normal ti mapaspasamak iti pagilianda gapu ta agtultuloy met pay laeng ti panagserrek dagiti pagadalan, trabaho ken uray dagiti dadakkel a pasdek ken pagpasiaran idiay Iran.
Nupay kasta, inpakaammona a makapungtot ti pagilian ti Iran iti panangraut ti Israel iti Iranian Embassy iti Damascus, Syria a nakatayan ti pito a kameng ti Islamic Revolutionary Guard Corps.
Kabayatanna, inlawlawagna a no kumaro ti kasasaadda iti Iran, kayatna ti agawid ditoy Pilipinas tapno nataltalged ken maliklikan ti riribuk.
