LAOAG CITY – Masapol a maipatungpal a dagus ti naiparuk-at nga Executive Order 100 mainaig iti pannakabalbaliw ti nababa a presyo ti irik tapno maprotehiran dagiti mannalon kontra iti agbaliw-baliw a presyo ken saan a patas a panaglako.
Daytoy ti inbatad ni Mr. Denver Dela Cruz, ti Presidente ti Sanghera iti San Marcelino iti ili ti Dingras ken agdama a Rice Coordinator ti Regional Agricultural and Fishery Council.
Kuna na a saan laeng koma a ti pannakaipangato ti presyo ti irik ti maaramid no di ket mamandar pay ti National Food Authority a saan laeng a buffer stock ti gatangen na no di ket unlimited stock.
Inlawlawag ni dela Cruz a no unlimited stock ti gatangen ti National Food Authority ket maakomodar amin ti maapit a produkto dagiti lokal a mannalon.
Innayon na a ti pay problema ket ti kaado dagiti mannalon a mapan aglako ti maapitna nga irik iti National Food Authority ket amangan no saanen a maakomondar ti dadduma no limitado ti panaggatang ti nasao nga ahensya.
Mainaig iti daytoy, kuna ni dela Cruz a gapu iti kastoy a mapaspasamak, ti ad-adda a mabenepenisyaran wenno mairanud ket dagiti traders gapu ta ado latta dagiti mapilitan a mannalon nga aglako kadakuada tapno maala da a dagus ti bayad da uray iti nababbaba a presyo.
