LAOAG CITY – Ginutigot ti Presidential Anti-Organized Crime Commission (PAOCC) dagiti lokal a gobierno, partikular dagiti Mayor, a makitinnulongda a mangpaksiat kadagiti illegal a Philippine Offshore Gaming Operators (POGOs) nga inawaganda kas scam farms.
Segun ken ni Presidential Anti-Organized Crime Commission spokesperson Winston Casio, kasapulan nga awagan ti Department of the Interior and Local Government (DILG) ti atension dagiti amin a lokal a chief executives no sadino nga isuda ti umuna a nakabasaran dagiti aktibidad seknan iti scam farm.
Kinunana pay a saan a mailibak ti kaadda dagiti illegal a Philippine Offshore Gaming Operators ditoy pagilyan.
Kinondenar pay ti opisyal ti Presidential Anti-Organized Crime Commission ti Philippine Amusement and Gaming Corporation gapu iti mapapati a kinakurang ti monitoring kadagiti Philippine Offshore Gaming Operators ken inyunay-unayna a saan nga agpatingga ti responsibilidad ti gaming regulator inton makanselar ti POGO permit.
Innayon pay ti opisyal a rumbeng a makikoordinar ti Philippine Amusement and Gaming Corporation kadagiti maseknan nga ahensia ti gobierno a pakairamanan ti Bureau of Investigation ken Department of the Interior and Local Government tapno masigurado a saan a mapalubosan nga ag-operae dagiti Philippine Offshore Gaming Operators a nakansela ti permit-da.
Daytoy ti inpakaammo ti opisyal kalpasan nga inrakurak ti Philippine Amusement and Gaming Corporation nga adda agarup 250 a Philippine Offshore Gaming Operators nga agop-operar ditoy pagilian nga awanan iti umno a lisensia ken posible a nairaman iti nagduduma a krimen.
