LAOAG CITY – Inkari ni Presiding officer Senator-Judge Francis ‘Chiz’ Escudero nga umalisto ti proseso ti impeachment trial ni Vice President Sara Duterte kadagiti sumarsaruno a lawas.
Inadmitir ni Escudero a dagiti immuna a lawas ti pannakaisayagkat ti impeachment trial ket naginad gapu ta ti depensa, prosekusyon ken uray dagiti senator-judges ket arigna agkarkarawa iti trial process.
Nupay kasta, inpasigurado ni Escudero nga uray agbalin ton a napardas ti taray ti impeachment trial ket saan a maiyalisto ti proseso.
Inrakurak ti senator-judge a mangnamnama a ti trial ket malpas sakbay wenno iti bolan ti Nobyembre wenno Disyembre ita a tawen, ngem agdepende kadagiti maipresentar a testigo iti agpada a prosekusyon ken depensa.
Immuna iti daytoy, saan a pinatgan ti Sandiganbayan ti kiddaw ni Senador Jinggoy Estrada nga agatendar ti impeachment trial ni Vice presidente Sara Duterte.
Kabayatanna, inpasingked ni Escudero ti patas a pannakatratar ti impeachment trial, ngem no aniaman ti pagresultaan na, siasinno man ti mapaboran ken masaktan ket mangnamnama nga awaten ti agsumbangir a partido, gapu ta ar-aramiden laeng ti senado ti trabaho da nga awan ti kankanunungan ti tunggal maysa kadakuada.
