LAOAG CITY – Dimmoble ti presio ti kamatis iti National Capital Region (NCR) gapu iti epekto ti Bagyo Julian, basar iti Department of Agriculture (DA).
Simrek iti nasao a bagyo iti Philippine Area of Responsibility idi Setiembre 2024 ken nangitunda ti nakaro a pannakadadael iti benneg ti agrikultura.
Dumanon iti P160 agingga iti P180 iti kada kilo ti presio ti kamatis manipud iti P80 agingga iti P90 ti balor daytoy iti napan a lawas.
Iti kinapudnona, bassit laengen ti inaynayon dagiti aglaklako iti presio ti kamatis gapu ta P140 iti kada kilo daytoy manipud kadagiti supplier.
Nadakamat a sakbay iti iduduprak ti Bagyo Julian, sobra-sobra pay ti suplay ti kamatis isu nga ibelbelleng ken maperperdi laeng dagitoy.
Inkari met ni Agriculture Secretary Francisco Tiu Laurel Jr. a malimitaranen ti panangibelleng ti nateng inton sumaruno a tawen.
