LAOAG CITY – Inpakaammo ni Mr. Jessie Prudencio, aglaklako ti bagas ti Laoag City Public Market and Commercial Complex a ngimmato manen ti presyo dagiti ilaklako da a bagas nangrugi itay napan a lawas.
Segun kenni Prudencio, ngimmato ti piso iti kada kilo dagiti nagduduma a klase ti bagas nga ilaklakod a kas ti regular milled rice ket 38 agingga 41 pesos iti kada kilo, ti well milled rice ket 40 pesos iti kada kilo idinto a ti special wenno premium rice ket umabot iti 55 pesos iti kada kilo.
Gapu iti daytoy, kunana nga adda met ti panaggaraw ti presyo ti bagas iti kada sako kas ti Jasmine nga 875 pesos, Premium ket 900 pesos iti kada sako idinto a ti Marcos Sinandomeng ket umabot iti 960 pesos iti kada kilo.
Nupay kasta, inlawlawag na nga umdas pay laeng ti suplay ti bagas a maaw-awat ti puestoda agpapan kadagitoy a gundaway.
Innayon na a no bilang adda manen ti panagngato ti farm gate price dagiti mannalon ket posible nga adda met ti panagkuti met ti agdama a presyo nga ipatpatungpal da.
Maipalagip nga adda ti panagngato ti presyo ti bagas kadagiti sumagmamano a merkado publiko idiay Metro Manila nga umabot iti 3 a pisos.
