LAOAG CITY – Agtalek ti Department of Agriculture a bumaba ti presyo ti taraon kadagiti sumarsaruno a bulan gapu iti manamnama a pannakaisubli ti food production ken suplay iti normal a lebel.
Segun ken ni Department of Agriculture Assistant Secretary Arnel de Mesa, patta-pattaen ti ahensia a lumaka ti presyo ti karne, ikan, nateng ken bagas.
Para iti karne ti baboy, ti panagpangina ti presyona ket ti agtultuloy pay laeng nga epekto ti African Swine Fever ken ti dakkel a demand para iti commodity idi last quarter ti 2024.
Kuna ni De Mesa a posible a lumaka ti karne ti baboy kadagiti merkado nangruna ket in-inut metten a makabaw-bawi dagiti hog raisers, agraman ti presyo ti nateng ta makarek-rekobren ti agricultural fields manipud iti epekto ti El Niño ken dagiti nagsasaruno a bagyo idi napan a tawen.
Idinto nga iti bagas, ket nakadepende iti panagbaba ti presyo iti world market ken ti deklarasyon iti ‘food security emergency’ ti manamnama a mangpalaka iti presyo ti bagas.
